मुंबई, दि. २ : महाराष्ट्र राज्य मार्ग परिवहन महामंडळाने (एसटी) प्रवाशांच्या सोयीसाठी ‘आवडेल तेथे कोठेही प्रवास पास’ योजनेतील पास आता ऑनलाइन उपलब्ध करून देण्याचा निर्णय घेतला आहे. त्यामुळे प्रवाशांना पास काढण्यासाठी आगारात जाण्याची किंवा रांगेत उभे राहण्याची आवश्यकता राहणार नाही. घरबसल्या ऑनलाइन पद्धतीने पास मिळवता येणार आहे.
एसटी महामंडळाच्या वाहतूक विभागाने २९ सप्टेंबर २०२६ रोजी जारी केलेल्या परिपत्रकानुसार, या योजनेतील चार आणि सात दिवसांच्या पाससाठी ऑनलाइन सुविधा सुरू करण्यात आली आहे. एसटी महामंडळाच्या अधिकृत संकेतस्थळावर तसेच मोबाईल अनुप्रयोगावर ही सुविधा उपलब्ध करून देण्यात आली आहे.
ऑनलाइन पास काढताना प्रवाशांना आवश्यक माहिती भरल्यानंतर नियमानुसार पास उपलब्ध होणार आहे. प्रवाशाला मिळालेला पास छापील स्वरूपात किंवा भ्रमणध्वनीमध्ये पीडीएफ स्वरूपात दाखवता येणार आहे. त्यामुळे पास घेण्याची प्रक्रिया अधिक सोपी आणि सुलभ होणार आहे.
क्यूआर संकेतांकाद्वारे तपासणी
ऑनलाइन मिळणाऱ्या पासवर क्यूआर संकेतांक देण्यात येणार आहे. प्रवासाच्या वेळी वाहकाच्या इलेक्ट्रॉनिक तिकीट यंत्राद्वारे हा संकेतांक स्कॅन करण्यात येईल. त्यानंतर प्रवाशाचे नाव, पासचा प्रकार, वैधता आणि इतर आवश्यक माहिती यंत्रावर दिसणार आहे.
तसेच प्रवाशाने दाखविलेल्या ओळखपत्राची पडताळणी करण्यात येणार असून, त्यानंतरच संबंधित प्रवाशाला प्रवासाची परवानगी दिली जाणार आहे. त्यामुळे ऑनलाइन पासचा गैरवापर रोखण्यासही मदत होणार आहे.
आगारातील गर्दी कमी होणार
ऑनलाइन सुविधेमुळे प्रवाशांना आगारात जाऊन पास काढण्यासाठी रांगेत उभे राहण्याची गरज कमी होणार आहे. विशेषतः सुट्टीच्या काळात आणि पर्यटनाच्या हंगामात या सुविधेचा प्रवाशांना फायदा होण्याची शक्यता आहे.
‘आवडेल तेथे कोठेही प्रवास पास’ योजनेचे डिजिटल स्वरूपात रूपांतर करून एसटी महामंडळाने प्रवाशांना घरबसल्या पास मिळविण्याची सुविधा उपलब्ध करून दिली आहे. त्यामुळे एसटीचा प्रवास अधिक सुलभ, आधुनिक आणि पारदर्शक होण्यास मदत होणार आहे.
