मुंबई, दि. १६ : होळी सणाच्या पार्श्वभूमीवर प्रवाशांची वाढती गर्दी लक्षात घेऊन Indian Railways कडून मुंबई आणि सावंतवाडी रोड दरम्यान विशेष रेल्वे गाड्या चालविण्याचा निर्णय घेण्यात आला आहे. या निर्णयामुळे कोकणात जाणाऱ्या व येणाऱ्या प्रवाशांना मोठा दिलासा मिळणार आहे.
मुंबई CSMT ते सावंतवाडी रोड दरम्यान धावणारी विशेष गाडी क्रमांक 01171 ही 26 फेब्रुवारी आणि 5 मार्च 2026 रोजी रात्री 12.20 वाजता सुटेल व त्याच दिवशी दुपारी 12.30 वाजता सावंतवाडी रोड येथे पोहोचेल. त्याचप्रमाणे सावंतवाडी रोड ते मुंबई CSMT ही परतीची विशेष गाडी क्रमांक 01172 ही 26 फेब्रुवारी व 5 मार्च रोजी सायंकाळी 5.20 वाजता सुटून दुसऱ्या दिवशी पहाटे 3.45 वाजता मुंबईला पोहोचेल. या गाड्या दादर, ठाणे, पनवेल, पेण, रोहा, माणगाव, वीर, खेड, चिपळूण, संगमेश्वर रोड, रत्नागिरी, राजापूर रोड, वैभववाडी रोड, कणकवली, सिंधुदुर्ग व कुडाळ या प्रमुख स्थानकांवर थांबणार आहेत.
याशिवाय लोकमान्य टिळक टर्मिनस ते सावंतवाडी रोड दरम्यानही विशेष गाड्या सुरू करण्यात येणार आहेत. गाडी क्रमांक 01119 ही 26 फेब्रुवारी व 5 मार्च रोजी रात्री 10.15 वाजता सुटेल व दुसऱ्या दिवशी सकाळी 9.30 वाजता सावंतवाडी रोड येथे पोहोचेल. परतीची गाडी क्रमांक 01120 ही 27 फेब्रुवारी व 6 मार्च रोजी सायंकाळी 5.20 वाजता सुटून दुसऱ्या दिवशी पहाटे 4.05 वाजता लोकमान्य टिळक टर्मिनस येथे पोहोचेल.
या विशेष गाड्यांमध्ये वातानुकूलित, स्लीपर तसेच जनरल डब्यांची सुविधा उपलब्ध असणार आहे. प्रवाशांसाठी गाडी क्रमांक 01172 व 01120 चे आरक्षण 18 फेब्रुवारीपासून सर्व आरक्षण केंद्रे, इंटरनेट व आयआरसीटीसी संकेतस्थळावर सुरू होणार आहे. होळी सणासाठी मोठ्या संख्येने गावाकडे जाणाऱ्या प्रवाशांना या विशेष गाड्यांचा निश्चितच फायदा होणार असून रेल्वे प्रशासनाने प्रवाशांनी वेळेत आरक्षण करून प्रवासाचा लाभ घ्यावा, असे आवाहन केले आहे.
