रत्नागिरी, दि. २१ (प्रतिनिधी): जिल्हा परिषद पूर्ण प्राथमिक शाळा, जांभरूण नं. १ येथे अंतरराष्ट्रीय योगदिन अत्यंत प्रेरणादायी वातावरणात, शिस्तबद्ध पद्धतीने आणि आनंदात साजरा करण्यात आला. निसर्गरम्य परिसर, शांत नदीचा किनारा आणि ताज्या हवेच्या सान्निध्यात विद्यार्थ्यांनी योगाचे महत्त्व स्वतःच्या कृतीतून अधोरेखित केले.
विद्यार्थ्यांनी प्राणायाम, सूर्यनमस्कार, विविध योगासने आणि ध्यान यांचा मनमोहक सादरीकरण करून “योग आरोग्यासाठी आवश्यक आहे” असा महत्त्वपूर्ण संदेश दिला. या प्रसंगी उपस्थित पालक, शिक्षक व ग्रामस्थांनी विद्यार्थ्यांच्या उपक्रमशीलतेचे भरभरून कौतुक केले.
कार्यक्रमाला शाळेचे मुख्याध्यापक श्री. राजेश पवार, शिक्षक श्री. संतोष रावणंग आणि शिक्षिका सौ. यास्मिन कोतवाल यांची विशेष उपस्थिती लाभली. त्यांनी विद्यार्थ्यांशी संवाद साधून योगाचे मानसिक व शारीरिक आरोग्यावर होणारे फायदे प्रभावीपणे विशद केले.
शाळेच्या संपूर्ण परिसरात सकारात्मकतेचा आणि अनुशासनाचा अनुभव मिळाला. विद्यार्थ्यांचे नियोजन, एकाग्रता आणि योगासने सादर करण्याची तंत्रशुद्ध पद्धत सर्वांच्या मनात आदर निर्माण करणारी होती.
“सशक्त शरीरातच सशक्त मन वसते” या विचाराचे मूर्त स्वरूप या कार्यक्रमात पाहायला मिळाले.
आरोग्य, अनुशासन आणि संस्कार यांचा सुंदर संगम म्हणजेच जांभरूण शाळेतील योगदिन!
