नवी दिल्ली, दि. १३ : भारत आणि अफगाणिस्तान यांच्यात दिल्लीतील अरुण जेटली स्टेडियमवर रविवारी खेळल्या गेलेल्या पहिल्या टी-२० सामन्याची सुरुवात एका अनोख्या पद्धतीने झाली. आंतरराष्ट्रीय क्रिकेट सामन्यापूर्वी राष्ट्रगीत ‘जन गण मन’च्या आधी प्रथमच ‘वंदे मातरम्’ सादर करण्यात आले. या अनपेक्षित बदलामुळे स्टेडियममधील प्रेक्षकांसह प्रेस बॉक्समधील काही जणही काही क्षण आश्चर्यचकित झाले.
सामन्यापूर्वीच्या सोहळ्यात सर्वप्रथम ‘वंदे मातरम्’ वाजवण्यात आले. त्यानंतर भारताचे राष्ट्रगीत ‘जन गण मन’ सादर करण्यात आले. आंतरराष्ट्रीय क्रिकेट सामन्याच्या पारंपरिक कार्यक्रमात अशा पद्धतीने ‘वंदे मातरम्’चा समावेश यापूर्वी झालेला नसल्याने या उपक्रमाची विशेष चर्चा रंगली.
भारतामध्ये आंतरराष्ट्रीय क्रिकेट सामन्यांपूर्वी राष्ट्रगीत सादर करण्याची परंपरा आहे. मात्र, यावेळी राष्ट्रगीतापूर्वी ‘वंदे मातरम्’ सादर करण्यात आल्याने सामन्यापूर्वीचा कार्यक्रम नेहमीपेक्षा अधिक वेळ चालला. त्याचा परिणाम नाणेफेकीच्या सोहळ्यावरही झाला.
नाणेफेकीपूर्वीचा संपूर्ण कार्यक्रम पूर्ण करण्यासाठी नेहमीपेक्षा काही मिनिटे अधिक लागली. त्यामुळे भारत-अफगाणिस्तान सामना नियोजित वेळेपेक्षा सुमारे चार मिनिटे उशिरा सुरू झाला. मात्र, या अनोख्या उपक्रमामुळे सामना सुरू होण्यापूर्वीच स्टेडियममध्ये वेगळे वातावरण निर्माण झाले.
दरम्यान, ‘वंदे मातरम्’नंतर ‘जन गण मन’ सादर होत असताना स्टेडियममधील प्रेक्षकांनी आदराने सहभाग घेतला. आंतरराष्ट्रीय क्रिकेटच्या मैदानावर राष्ट्रगीतापूर्वी ‘वंदे मातरम्’ सादर करण्याची ही पहिलीच वेळ असल्याने क्रिकेटप्रेमी आणि क्रीडा क्षेत्रातही या नव्या व्यवस्थेबाबत उत्सुकता निर्माण झाली आहे.
