कै.डॉ. अशोक पोवार स्मृति पुरस्काराची पहिली मानकरी – कल्याणी पाटील

दापोली, दि. ०७ (प्रतिनिधी): डॉ. बाळासाहेब सावंत कोकण कृषि विद्यापीठांतर्गत बी. टेक. (कृषि अभियांत्रिकी) पदवी परीक्षेत प्रथम क्रमांकाने उत्तीर्ण झालेली कृषि अभियांत्रिकी आणि तंत्रज्ञान महाविद्यालय, दापोलीची कल्याणी पाटील ही कै. डॉ.अशोक पोवार स्मृती पुरस्काराची प्रथम मानकरी ठरली आहे. अलीकडेच झालेल्या डॉ. बाळासाहेब सावंत कोकण कृषि विद्यापीठाच्या 43 व्या पदवीदान समारंभामध्ये तिला या पुरस्काराने गौरविण्यात आले.

या पुरस्काराची पार्श्वभूमी थोडक्यात अशी आहे. सन 1999 पर्यंत कोकण कृषि विद्यापीठात कृषि अभियांत्रिकी विषयात उच्च शिक्षण घेण्याची सुविधा उपलब्ध नव्हती. हे लक्षात घेऊन आदरणीय डॉ. अशोक पोवार यांनी यासाठी पुढाकार घेत प्रयत्न सुरु केले. यासाठीचा प्रस्ताव तयार करून त्यास विद्यापीठाच्या विविध प्राधिकरणांची मंजुरी घेण्यापासून ते शासन स्तरावर विधिमंडळातील मंजुरी मिळविण्यासाठी त्यांनी अथक परिश्रम घेतले. त्यांच्या या प्रयत्नातून दापोली येथे कृषि अभियांत्रिकी आणि तंत्रज्ञान महाविद्यालय स्थापन करण्याबाबतचा शासन निर्णय निर्गमित होऊन 3 जुलै 1999 रोजी हे महाविद्यालय सुरु झाले. या महाविद्यालयाचे ते पहिले सहयोगी अधिष्ठाता होते. विद्यापीठ सेवेत असेपर्यंत त्यांनी या महाविद्यालयाच्या शैक्षणिक प्रगतीमध्ये अतुलनीय योगदान देऊन देशपातळीवर या महाविद्यालयाचा ठसा उमटविला.

आदरणीय डॉ. अशोक पोवार यांच्या या योगदानच्या स्मृती कायमस्वरूपी लक्षात रहाव्यात यासाठी त्यांचे कुटुंबीय आणि कै. शामल अशोक पोवार शैक्षणिक न्यासाच्या वतीने कृषि अभियांत्रिकी विषयात प्रथम क्रमांकाने पदवी उत्तीर्ण करणाऱ्या विद्यार्थ्यास कै. डॉ.अशोक पोवार स्मृती पुरस्कार देण्यात यावा असे प्रस्तावित करण्यात आले. त्यासाठी डॉ. बाळासाहेब सावंत कोकण कृषि विद्यापीठाकडे प्रस्ताव पाठविण्यात आला. विद्यापीठ प्रशासनाने यासाठी रु. 3,00,000/- एवढी रक्कम विद्यापीठाकडे जमा करण्यास कळविले. यानंतर कै. अशोक पोवार यांचे कनिष्ठ बंधू डॉ. अनिल पोवार आणि त्यांच्या कुटुंबियांनी रु. 3,00,000/- एवढी रक्कम संस्थेकडे जमा केली. संस्थेने रीतसर प्रस्ताव तयार करून रु. 3, 00,000/- एवढ्या रकमेसह तो विद्यापीठाकडे सादर केला. या प्रस्तावास मा. कुलगुरू डॉ. संजय भावे आणि विद्यापीठाची विद्या परिषद तसेच  कार्यकारी परिषद यांनी मान्यता दिली. व या वर्षांपासूनच्या पदवीदान समारंभामध्ये कै. डॉ.अशोक पोवार स्मृती पुरस्कार देण्याचे मान्य केले. या निर्णयाबाबत मा. कुलगुरू डॉ. संजय भावे आणि विद्या परिषद आणि कार्यकारी परिषदेचे सन्माननीय सदस्य यांना संस्थेच्या वतीने धन्यवाद देण्यात आले आहेत.

या निर्णयाप्रमाणे सन 2024-25 चा पुरस्कार विद्यापीठाच्या 43 व्या पदवीदान समारंभमध्ये महाराष्ट्र राज्याचे मा. राज्यपाल  सी. पी. राधाकृष्णन यांच्या हस्ते आणि कृषीमंत्री  माणिकराव कोकाटे, मा. कुलगुरू डॉ. संजय भावे, कुलसचिव डॉ. प्रदीप हळदवणेकर यांच्या उपस्थितीत  कल्याणी बाबाजी पाटील हिला प्रदान करण्यात आला. यासाठी संस्थेच्या वतीने कल्याणीचे हार्दिक अभिनंदन करून तीला पुढील वाटचालीसाठी शुभेच्छा दिल्या.