रत्नागिरी, दि.७ : आधुनिक भारताचे शिल्पकार आणि भारतीय संविधानाचे जनक भारतरत्न डॉ. बाबासाहेब आंबेडकर यांच्या ६९व्या महापरिनिर्वाण दिनानिमित्त रत्नागिरी शहरात मध्यरात्री लाखो भाविकांचा जनसागर उसळला. तालुक्याच्या विविध भागातून हजारो अनुयायी रात्री १० वाजल्यापासून शासकीय रुग्णालयाजवळील पुतळा परिसरात पोहोचू लागले आणि मध्यरात्री १२ वाजता ठिकठिकाणी “जय भीम”च्या घोषणांनी संपूर्ण परिसर दुमदुमला.
मध्यरात्री IPS बगाटेंचे शांत-सौम्य अभिवादन
रात्री बारा वाजता रत्नागिरीचे जिल्हा पोलीस अधीक्षक IPS नितीन बगाटे शांत, विनयशील उपस्थितीत पुतळ्यासमोर पोहोचले. त्यांनी डॉ. बाबासाहेबांच्या पूर्णाकृती पुतळ्यास पुष्पhaar अर्पण करून अभिवादन केले. त्या क्षणी उपस्थितांनी रस्ता मोकळा करत त्यांच्या आगमनाचे स्वागत केले. दमदार प्रशासकीय कार्य, लोकाभिमुख शैली आणि संवेदनशील भूमिका यामुळे IPS बगाटे यांच्याबद्दल आदराची भावना अधिक दृढ होत असल्याचे अनुयायांनी सांगितले.
समता सैनिक दलाने शिस्तीचे संचलन करत पुतळ्यास सलामी दिली. कायद्याच्या रक्षणकर्त्या अधिकाऱ्यांकडून मध्यरात्री महामानवांना अभिवादन होत असल्याचे दृश्य अनेकांच्या डोळ्यांत पाणी आणणारे ठरले. या वेळी अप्पर पोलीस अधीक्षक महामुनी, उपविभागीय पोलिस अधिकारी माईंनकर आणि शहर पोलिस निरीक्षक विवेक पाटील यांनीही उपस्थित राहून पूजा-अभिवादन केले.
हजारो अनुयायांचा मध्यरात्री ओघ
गावोगावाहून आलेले लहान मुलांपासून ते ज्येष्ठांपर्यंत सर्वांनी मध्यरात्री अर्पण-पूजेचा मान मिळावा म्हणून शिस्तबद्ध रांगांमध्ये दर्शन घेतले. समता सैनिक दलाच्या विनोदी व समन्वयपूर्ण नेतृत्वामुळे दर्शन प्रक्रिया अत्यंत सुरळीत झाली. पंचशील ग्रहण आणि पुष्पचक्र अर्पण करत धार्मिक संघटनांनी अभिवादन केले आणि धम्म, समता व बंधुता यांचा संदेश पुन्हा जागा झाला.
पोलीसांचा अभेद्य बंदोबस्त
या मोठ्या गर्दीचा विचार करून शहर पोलिस निरीक्षक विवेक पाटील यांनी वाहतूक, सुरक्षा आणि शिस्त नियंत्रणाची काटेकोर आखणी केली. ते स्वतः रात्री उशिरापर्यंत घटनास्थळी उपस्थित राहून संपूर्ण सोहळ्यावर लक्ष ठेवत होते. पोलिस बंदोबस्त आणि समता सैनिक दलाच्या समन्वयामुळे कोणताही अनुचित प्रकार न घडता कार्यक्रम शांततेत पार पडला.
रत्नागिरीत भारतीय बौद्ध महासभेतर्फे बाबासाहेबांना अभिवादन
महामानव डॉ. बाबासाहेब आंबेडकर यांच्या ६९व्या महापरिनिर्वाण दिनानिमित्त भारतीय बौद्ध महासभेच्या रत्नागिरी जिल्हा शाखेतर्फे अभिवादन करण्यात आले. बौद्ध अनुयायांनी बोधीसत्व डॉ. आंबेडकरांच्या प्रतिमेस पुष्पांजली अर्पण करून संविधान, समता, सामाजिक न्याय व बंधुतेच्या मूल्यांना पुन्हा अधोरेखित केले.
या प्रसंगी जिल्हा पदाधिकारी प्रदीप जाधव, विजय जाधव, जनार्दन मोहिते, विजय कांबळे, तानाजी कांबळे, सुनील पवार आणि रविचंद्र कांबळे उपस्थित होते. डॉ. आंबेडकरांच्या संविधानदृष्टिकोनाची आजच्या काळातील अत्यावश्यकता, मानवी हक्कांची परंपरा आणि बुद्धांच्या करुणामय धम्मविचारांची उपयुक्तता यावर पदाधिकाऱ्यांनी भावना व्यक्त केल्या.
महापरिनिर्वाण दिनी अनुभवल्या जाणाऱ्या विचारगंभीर, संयत आणि भावपूर्ण क्षणांतून सामाजिक परिवर्तनाची ज्योत कायम प्रज्वलित ठेवण्याचा निर्धारही व्यक्त करण्यात आला.
