मुंबई, दि. २५ : शिवसेना (शिंदे गट) खासदार संजय दिना पाटील यांनी पत्रकारांना शिवीगाळ करत धमकी दिल्याचा व्हिडिओ समोर आल्यानंतर राज्याच्या राजकीय वर्तुळात खळबळ उडाली आहे. पत्रकारांनी राजकीय घडामोडींवर प्रतिक्रिया विचारल्यानंतर संतप्त झालेल्या पाटील यांनी “तुम्ही परत इकडे आलात तर मी तुम्हाला मारून पाठवेन. हे कॅमेऱ्यात रेकॉर्ड करा. पोलिसांसमोर सांगतोय, जे करायचे ते करा,” अशा शब्दांत पत्रकारांना धमकावल्याचा आरोप आहे.
या घटनेनंतर पावसाळी अधिवेशनात पत्रकारांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना याबाबत प्रश्न विचारले. त्यावर प्रतिक्रिया देताना एकनाथ शिंदे म्हणाले की, संजय दिना पाटील यांच्याशी आपली चर्चा झाली असून त्यांचा पत्रकारांचा अपमान करण्याचा हेतू नव्हता. “त्यांच्यावर सातत्याने काही व्यक्तींनी अत्यंत खालच्या पातळीवर टीका केली होती. त्यातून निर्माण झालेला राग पत्रकारांवर निघाला. मात्र त्यांच्याकडून काही अयोग्य शब्द वापरले गेले असतील तर त्यांनी दिलगिरी व्यक्त करावी, अशा सूचना मी त्यांना दिल्या आहेत,” असे शिंदे यांनी स्पष्ट केले.
मुख्यमंत्री देवेंद्र फडणवीस यांनीही या घटनेची गंभीर दखल घेतली. “कोणालाही अशा प्रकारची धमकी देणे योग्य नाही. मी याबाबत संपूर्ण माहिती घेणार असून अशा प्रकारचे वर्तन अयोग्य आहे,” असे त्यांनी सांगितले.
दरम्यान, शिवसेना नेते व मंत्री संजय शिरसाट यांनी संजय दिना पाटील यांच्या वतीने पत्रकारांची माफी मागितली. “घडलेला प्रकार चुकीचा आहे. एखाद्या गोष्टीचा राग आला म्हणून अशा प्रकारची भाषा वापरणे योग्य नाही. पत्रकारांशी आदराने वागले पाहिजे,” असे ते म्हणाले.
विरोधी पक्षातील नेत्यांनीही या घटनेवर तीव्र प्रतिक्रिया दिली. राष्ट्रवादी काँग्रेस (शरद पवार गट)चे नेते जयंत पाटील यांनी पत्रकारांशी बोलताना संयम राखणे आवश्यक असल्याचे सांगितले. “पत्रकारांशी बोलताना चुकीची भाषा वापरणे म्हणजे नियंत्रण गमावल्याचे लक्षण आहे. लोकप्रतिनिधींनी सभ्यता आणि अदब राखली पाहिजे,” असे त्यांनी म्हटले.
पत्रकारांना दिलेल्या धमकीमुळे संजय दिना पाटील यांच्यावर सर्व स्तरांतून टीका होत असून, या प्रकरणाने राज्यातील राजकीय वातावरण तापले आहे. पत्रकार संघटनांकडूनही या प्रकाराचा निषेध व्यक्त केला जात आहे.
