रत्नागिरी, दि. ०६ : गणेशोत्सवासाठी कोकणात जाणाऱ्या चाकरमान्यांची वाढती गर्दी लक्षात घेऊन मध्य रेल्वेने पुणे-रत्नागिरी मार्गावर सहा विशेष गाड्या चालविण्याचा निर्णय घेतला आहे. ‘ट्रेन ऑन डिमांड’ उपक्रमांतर्गत १२ ते २६ सप्टेंबरदरम्यान या विशेष गाड्या धावणार आहेत. त्यामुळे सणासुदीच्या काळात नियमित रेल्वेगाड्यांवरील गर्दीचा ताण कमी होऊन प्रवाशांना मोठा दिलासा मिळणार आहे.
गाडी क्रमांक ०१४४७ पुणे-रत्नागिरी विशेष १२, १९ आणि २६ सप्टेंबर रोजी पुण्याहून मध्यरात्री १२.२५ वाजता सुटेल आणि त्याच दिवशी सकाळी ११.५० वाजता रत्नागिरीला पोहोचेल. परतीची ०१४४८ रत्नागिरी-पुणे विशेष त्याच दिवशी सायंकाळी ५.५० वाजता रत्नागिरीहून सुटून दुसऱ्या दिवशी पहाटे ५.२० वाजता पुण्यात दाखल होईल.
याशिवाय ०१४४५/०१४४६ या विशेष गाड्यांच्या अतिरिक्त फेऱ्या १५ आणि २२ सप्टेंबर रोजी चालविण्यात येणार आहेत. या गाड्यांचे पुण्याहून प्रस्थान रात्री १२.२५ वाजता, तर रत्नागिरीहून परतीचे प्रस्थान सायंकाळी ५.५० वाजता होणार आहे.
प्रवाशांची सोय लक्षात घेऊन विशेष गाड्यांना मार्गावरील प्रमुख स्थानकांवर थांबे देण्यात आले आहेत. चिंचवड, तळेगाव, लोणावळा, कल्याण, पनवेल, पेन, रोहा, माणगाव, वीर, करंजाडी, खेड, चिपळूण, सावर्डा, अरवली रोड आणि संगमेश्वर रोड या स्थानकांचा त्यामध्ये समावेश आहे.
गणेशोत्सव काळात कोकण रेल्वे मार्गावर प्रवाशांची मोठी गर्दी होत असते. मुंबई, पुणे आणि परिसरातून मोठ्या संख्येने चाकरमानी गणेशोत्सवासाठी कोकणात दाखल होतात. त्यामुळे रेल्वे प्रशासनाने अतिरिक्त गाड्यांची व्यवस्था केल्याने प्रवासाचे नियोजन करणाऱ्या प्रवाशांना पर्याय उपलब्ध झाला आहे.
या विशेष गाड्यांचे आरक्षण विशेष शुल्कासह सुरू असून, प्रवाशांना आयआरसीटीसीच्या अधिकृत संकेतस्थळावर तसेच रेल्वेच्या तिकीट खिडकीवरून आरक्षण करता येणार आहे. गणेशोत्सवाच्या पार्श्वभूमीवर उपलब्ध झालेल्या या अतिरिक्त रेल्वेसेवेमुळे कोकणवासीयांना मोठा दिलासा मिळण्याची अपेक्षा आहे.
