प्रशांत यादव यांच्या रूपाने शरदचंद्रजी पवार राष्ट्रवादीला मिळणार कोकणातून नवा आमदार

चिपळूण, दि. २२ (प्रतिनिधी): 

  राष्ट्रवादी काँग्रेस पार्टीचे पक्षप्रमुख शरदचंद्रजी पवार यांच्या पाठबळामुळेच चिपळूण-संगमेश्वर विधानसभा मतदारसंघात राष्ट्रवादीच्या नव्या प्रशांत पर्वाला सुरुवात होत आहे .प्रशांत यादव आमदार होण्यासाठी कार्यकर्त्यांनी कंबर कसली असून विधानसभा मतदारसंघांमध्ये कार्यकर्ते पूर्ण ताकतीनिशी कामाला लागले आहेत. महाविकास आघाडी यांच्यासह सर्वच पक्षातून यादव यांच्या नावाला पसंती मिळताना दिसत आहे.

राष्ट्रवादी प्रवेशानंतर प्रशांत यादव यांनी आपल्या झंजावती दौऱ्यातून चिपळूण -संगमेश्वर  विधानसभा मतदारसंघ चांगलाच पिंजकून काढला आहे. आपण स्वतः विधानसभेचा उमेदवार असल्याचे मानून यादव यांचे प्रत्येक कार्यकर्ते अगदी तळमळीने कामाला लागले आहेत.आगामी विधानसभा मतदारसंघात चिपळूण संगमेश्वर मधून प्रशांत यादव यांच्या रूपाने शरदचंद्रजी पवार राष्ट्रवादीला हक्काचा आमदार मिळेल अशी प्रतिक्रिया अनेकांनी व्यक्त केली.शरदचंद्रजी पवार साहेब यांच्या उपस्थितीमध्ये आज सोमवारी होणाऱ्या राष्ट्रवादी पार्टीच्या मेळाव्यामध्येच प्रशांत यादव यांच्या विधानसभा निवडणुकीच्या प्रचाराचा नारळ फुटणार असल्याचे बोलले जात आहे. प्रशांत यादव यांच्या नेतृत्वावर विश्वास ठेवून चिपळूण संगमेश्वर विधानसभा मतदारसंघातील हजारो कार्यकर्त्यांनी तुतारी फुंकण्याचा निर्णय घेतला आहे.

तळ कोकणापासून राष्ट्रवादी पक्ष नव्याने बांधणीसाठी पक्षप्रमुख शरदचंद्रजी पवार  यांनी स्वतः जातीने लक्ष घातले असून येथे पक्ष वाढवण्यासाठी प्रयत्न सुरू केले आहेत. कोकणात वाशिष्टी डेअरीच्या माध्यमातून हजारो हातांना रोजगाराचे साधन निर्माण करून देणारे राष्ट्रवादीचे प्रदेश सरचिटणीस उद्योजक प्रशांत यादव यांची चिपळूण संगमेश्वर-विधानसभा मतदारसंघात दिवसेंदिवस वाढती लोकप्रियता लक्षात घेता शरदचंद्रजी पवार यांनी प्रशांत यादव रुपी मोहरा हेरण्याचे ठरवून राष्ट्रवादी पक्षात प्रवेश केल्यापासूनच खा. पवार  यांनी प्रशांत यादव यांना राष्ट्रवादी पक्षाकडून लागेल ती ताकद देण्याचे ठरविले आहे.आगामी विधानसभा निवडणुकीमध्ये महाविकास आघाडी कडून प्रशांत यादव हे संभाव्य उमेदवार असू शकतात असे बोलले जाते तर महायुतीकडून विद्यमान आमदार शेखर निकम हे  निवडणूक लढवू शकतात दरम्यान चिपळूण संगमेश्वर विधानसभा मतदारसंघातील या हेवीवेट फाईट (लढतीकडे) संपूर्ण महाराष्ट्राचे लक्ष लागून राहणार आहे.

काँग्रेस मधून आल्यानंतर काही महिन्यात चिपळूण संगमेश्वर विधानसभा मतदारसंघ ढवळून काढत पक्षाला मजबूत अवस्थेत आणणाऱ्या प्रशांत यादव यांच्या मोर्चेबांधणीसाठी खुद्द पवार हे चिपळुणात  येत आहेत आजच्या जाहीर सभेत शेतकरी कामगार मजूर मच्छीमार यांच्यासह विविध घटकातील नागरिकांशी  ते संवाद साधणार आहेत या दौऱ्यात प्रदेशाध्यक्ष जयंत पाटील, बाळासाहेब पाटील, आ. जितेंद्र आव्हाड यांच्यासह पक्षातील अनेक दिग्गज नेते मंडळी उपस्थित राहणार आहेत.

महाराष्ट्र राज्यात शिवसेना आणि राष्ट्रवादी पक्ष फुटी नंतर झालेल्या सत्ता परिवर्तनानंतर आगामी विधानसभा निवडणुकीच्या निमित्ताने राष्ट्रवादी काँग्रेस शरदचंद्र पवार पक्षाचे राष्ट्रीय अध्यक्ष शरदचंद्रजी पवार हे आज सोमवारी २३ सप्टेंबर रोजी भव्यसभेला संबोधित करणार आहेत. नगर परिषदेच्या सावरकर मैदानात त्यांची जाहीर सभा होणार आहे. पवार यांच्या स्वागतासाठी राष्ट्रवादी काँग्रेस पक्ष सज्ज झाला असून राज्य प्रदेश सरचिटणीस उद्योजक प्रशांत यादव यांच्या मार्गदर्शनाखाली कार्यकर्त्यांकडून सभेची जोरदार तयारी करण्यात आली आहे काल रविवारी सायंकाळी उशिराने शरद पवार हे कराड येथून चिपळूणात दाखल झाले आहेत,चिपळूण नागरी सहकारी पतसंस्थेच्या सहकार भवन येथे त्यांचा काल मुक्काम होता. छत्रपती शिवाजी महाराज, डॉ. बाबासाहेब आंबेडकर यांच्या पुतळ्याला पुष्पहार अर्पण करून ते सावरकर मैदानात आयोजित सभेला हजर राहणार आहेत. माजी आमदार रमेश कदम यांच्या निवासस्थानी व वाशिष्ठी डेअरी प्रकल्पाला ते आज भेट  देणार आहेत.

दस्तूर खुद्द पवार साहेबच आपल्या पाठीशी असल्यामुळे प्रशांत यादव यांच्या कार्यकर्त्यांमध्ये ही मोठ्या प्रमाणात उत्साह संचारला आहे विधानसभा मतदारसंघात आपण स्वतः राष्ट्रवादीचे उमेदवार असल्याचे मानून प्रत्येक कार्यकर्ता घरोघरी वाडी वाडी वस्तीमध्ये पोहोचून शरदचंद्रजी पवार  राष्ट्रवादी पक्षाचे विचार आणि प्रशांत यादव यांच्या सामाजिक सलोख्याविषयी लोकांमध्ये जनजागृती करताना दिसत आहेत. श्री. प्रशांत यादव गेली अनेक वर्ष राजकारणात सक्रिय असून त्यांच्या राजकीय वाटचालीची सुरुवात खेर्डी ग्रामपंचायत पासून झाली या काळात त्यांनी सुरुवातीपासूनच सर्वसामान्य लोकांच्या संपर्कात राहून त्यांच्या अडीअडचणी जाणून घेऊन प्रत्येकाला शक्य होईल तेवढा मदतीचा हात देण्याचे काम केले. यामुळेच त्यांची पुढील काळात लोकप्रियता वाढू लागली कोरोना संक्रमण काळ असो वा महापुराचे संकट तसेच प्रत्येक वेळी येणारी नैसर्गिक आपत्ती या काळात देखील प्रशांत यादव शेतकरी कुटुंब व्यवसायिक छोटे दुकानदार गोरगरीब जनतेच्या मागे पालक म्हणून उभे राहिले .संकट काळात प्रशांत यादव यांची उल्लेखनीय कामगिरी राहिली आहे.

वाशिष्टी मिल्क अँड मिल्क प्रॉडक्ट या दुग्धजन्य उद्योग व्यवसायाच्या माध्यमातूनही त्यांनी कोकणामध्ये हजारो तरुणांना रोजगार उपलब्ध करून दिला आहे. नोकरी व्यवसाया निमित्त गाव सोडून मुंबई पुणे आदी मोठ्या शहरांमध्ये जाणाऱ्या गावाकडील तरुणांना आपल्या गावातच थांबवून ठेवणे त्यांच्या हाताला रोजगार देणे शेती व्यवसायातून त्यांना बळकटी देणे हा एकमेव उपक्रम प्रशांत यादव यांनी चिपळूण संगमेश्वर-विधानसभा मतदारसंघात राबविला आहे. वाशिष्टी उद्योग समूहाच्या माध्यमातून आज शेतकरी वर्ग मोठ्या प्रमाणात सुखी झाला असून असंख्य शेतकरी वर्ग प्रशांत यादव यांना चांगला आशीर्वाद देत आहेत. उद्योग व्यवसायातील धावपळीनंतर देशातील राष्ट्रवादी पक्षांमध्ये सक्रिय व्हावं या उद्देशाने प्रशांत यादव यांनी काँग्रेस पक्षातील उत्कृष्ट कामगिरीनंतर माजी केंद्रीय कृषी  मंत्री  खासदार शरदचंद्रजी पवार साहेब यांच्या नेतृत्वावर विश्वास ठेवून काही महिन्यांपूर्वी राष्ट्रवादी काँग्रेस पार्टीमध्ये प्रवेश केला.राष्ट्रवादी पक्षात देखील त्यांना अल्पावधीतच पक्षश्रेष्ठींनी त्यांच्या कामगिरीची दखल घेऊन मानाचे पान दिले.

राष्ट्रवादी काँग्रेस पार्टी प्रदेश सरचिटणीस म्हणून पद त्यांना देऊन पक्षात सन्मान केला प्रशांत यादव यांचे राष्ट्रवादी पक्षात वरिष्ठ पातळीवर देखील जेष्ठ नेत्यांची अत्यंत सलोख्याचे संबंध राहिले आहेत राष्ट्रवादी प्रदेशाध्यक्ष जयंत पाटील  हे देखील प्रशांत यादव यांची आपुलकीने विचारपूस करून श्री .यादव घेऊन गेलेल्या प्रत्येक कामांना ते प्राधान्य देतात मूळच्या राष्ट्रवादी काँग्रेस पार्टीमध्ये दोन गट पडल्यानंतर महाराष्ट्रामध्ये शरदचंद्रजी पवार राष्ट्रवादी काँग्रेस पार्टीला दिवसेंदिवस राज्यात उभारी मिळत असल्याचे दिसत आहे. चिपळूण संगमेश्वर विधानसभा मतदारसंघातून प्रशांत यादव यांच्या रूपाने राष्ट्रवादीला एक आश्वासक चेहरा मिळाला आहे या संधीचा फायदा उठवत शरदचंद्रजी पवार आणि राष्ट्रवादीचे पक्षश्रेष्ठी यांनी प्रशांत यादव यांना वेळोवेळी पक्षाची ताकद देण्याचे ठरविले आहे. आज सोमवार दिनांक २३ सप्टेंबर रोजी. पक्षाध्यक्ष शरदचंद्रजी पवार  यांच्या मुख्य उपस्थितीत होणाऱ्या राष्ट्रवादी काँग्रेस पार्टीच्या मेळाव्यामध्ये चिपळूण संगमेश्वर विधानसभा मतदारसंघाला यादव यांच्या रूपाने एक वेगळ्या प्रकारची ताकद मिळणार असून आज पासून राष्ट्रवादीच्या प्रशांत पर्वाला खऱ्या अर्थाने सुरुवात होईल असे जाणकारांचे मत आहे. दरम्यान चिपळूण शहरात देखील शरदचंद्रजी पवार यांच्या स्वागताचे जोरदार शुभेच्छा फलक लावण्यात आले आहेत.तसेच सोशल मीडिया वरती देखील प्रशांत यादव यांचाच सर्वत्र बोलबाला दिसत आहे.

प्रशांत यादव हे गेली अनेक वर्ष राजकारण आणि सामाजिक क्षेत्रात वावरत असताना त्यांनी त्यांच्या शांत संयमी आणि मनमिळावू स्वभावामुळे सर्वच राजकीय पक्षातील मंडळींशी अत्यंत सलोख्याचे संबंध प्रस्थापित केले आहेत.व प्रत्येकाला आपलेसे केले आहे.महाविकास आघाडीतील विविध घटक पक्षांमधून देखील चिपळूण संगमेश्वर विधानसभा मतदारसंघासाठी आगामी विधानसभा निवडणुकीत प्रशांत यादव यांच्या रूपानेच उमेदवार मिळावा अशी मागणी होत आहे.दरम्यान याबाबतचा अंतिम निर्णय महाविकास आघाडीचे मुख्य पक्षश्रेष्ठी एकत्र चर्चा करूनच घेतील असे राष्ट्रवादीचे पक्ष निरीक्षक बबनराव कनावचे यांनी नुकतेच चिपळूणमध्ये स्पष्ट केले. अजित पवार गटाचे चिपळूणचे आमदार शेखर निकम यांना फाईट देण्यासाठी प्रशांत यादव हेच एकमेव हेवीवेट उमेदवार ठरू शकतात असे अनेक राजकारणातील जाणकार मंडळीनी मत व्यक्त केले.

राष्ट्रवादीचे नेते प्रशांत यादव यांच्या राष्ट्रवादीतील गरुड भरारी मध्ये त्यांच्या सौभाग्यवती सौ .स्वप्ना प्रशांत यादव यांचा देखील मोठा सिंहाचा वाटा राहिला आहे. त्या अगदी यादव यांच्या खांद्याला खांदा लावून वेळोवेळी त्यांच्या पाठीशी खंबीर उभे राहिल्या आहेत . त्यांनी देखील चिपळूण संगमेश्वर विधानसभा मतदारसंघात महिलांचे मोठ्या प्रमाणात संघटन उभे केले असून वेगवेगळ्या माध्यमातून महिलांच्या हाताला काम मिळवून देणे तसेच बचत गटांच्या उत्पादनांना  बाजारपेठेत मागणी उपलब्ध करून देणे. या आणि अन्य महत्त्वाच्या महिलांना उपयोगी कामांसाठी त्यांचा नेहमी पुढाकार राहिला आहे वाशिष्टी मिल्क अँड मिल्क प्रॉडक्ट यांच्यावतीने काही महिन्यापूर्वी चिपळूणमध्ये कोकणातील भव्य दिव्य असा कृषी मेळावा घेण्यात आला होता यामध्ये देखील श्री. प्रशांत यादव यांच्या सोबत सौ.स्वप्ना यादव यांनी अगदी जीवाचे रान करून कृषी मेळावा यशस्वी होण्यासाठी विशेष प्रयत्न केले होते.

हा मेळावा देखील संपूर्ण महाराष्ट्रात लक्षवेधी ठरला होता कोकणामध्ये यापूर्वी असा यशस्वी प्रयोग कुठे झाला नव्हता वाशिष्ठ डेअरीने कृषी मेळावा घेऊन शेतकरी किती समृद्ध होऊ शकतो आपल्याकडीलच जमिनीत विविध प्रकारचे उत्पादने घेऊन शेतकरी कसा श्रीमंत होऊ शकतो याचा सुंदर मंत्र यादव दाम्पत्यांनी कृषी मेळाव्याच्या माध्यमातून शेतकऱ्यांना दिला होता. राष्ट्रवादी काँग्रेस पार्टीचे पक्षप्रमुख शरदचंद्रजी पवार साहेब यांच्या पाठबळामुळेच चिपळूण विधानसभा मतदारसंघात राष्ट्रवादीच्या नव्या प्रशांत पर्वाला सुरुवात होत आहे .प्रशांत यादव आमदार होण्यासाठी कार्यकर्त्यांनी कंबर कसली असून विधानसभा मतदारसंघांमध्ये कार्यकर्ते पूर्ण ताकतीनिशी कामाला लागले आहेत.

महाविकास आघाडी यांच्यासह सर्वच पक्षातून यादव यांच्या नावाला पसंती मिळताना दिसत आहे. राष्ट्रवादी प्रवेशानंतर प्रशांत यादव यांनी आपल्या झंजावती दौऱ्यातून चिपळूण  -संगमेश्वर  विधानसभा मतदारसंघ चांगलाच पिंजकून काढला आहे. आपण स्वतः विधानसभेचा उमेदवार असल्याचे मानून यादव यांचे प्रत्येक कार्यकर्ते अगदी तळमळीने कामाला लागले आहेत. आगामी विधानसभा मतदारसंघात चिपळूण संगमेश्वर मधून प्रशांत यादव यांच्या रूपाने शरदचंद्रजी पवार यांच्या राष्ट्रवादीला हक्काचा आमदार मिळेल अशी प्रतिक्रिया अनेकांनी व्यक्त केली.

शरदचंद्रजी पवार  यांच्या उपस्थितीमध्ये आज सोमवारी होणाऱ्या राष्ट्रवादी पार्टीच्या मेळाव्यामध्येच प्रशांत यादव यांच्या विधानसभा निवडणुकीच्या प्रचाराचा नारळ फुटण्याची शक्यता व्यक्त केली जात आहे.

चिपळूण संगमेश्वर विधानसभा मतदारसंघातील  हजारो कार्यकर्त्यांनी या विधानसभा निवडणुकीत प्रशांत यादव यांच्या नेतृत्वाखाली संपूर्ण महाराष्ट्रात दुमदुमेल  तुतारी फुंकण्याचा निर्णय घेतल्याचे समजते.