राजापूर, दि. २८ : ग्रामीण भागातील नागरिकांना आरोग्य सुविधा उपलब्ध व्हाव्यात आणि गरजू रुग्णांना मदत मिळावी, या सामाजिक बांधिलकीतून फिनोलेक्स इंडस्ट्रीज लिमिटेड (FIL) आणि तिचे सीएसआर भागीदार मुकुल माधव फाउंडेशन (MMF) यांच्या वतीने राजापूर तालुक्यातील आडिवरे येथील कर्तव्य प्रतिष्ठानला विविध वैद्यकीय उपकरणे प्रदान करण्यात आली.
या उपकरणांमध्ये फोल्डिंग बेड, व्हीलचेअर, कमोड चेअर, शवपेटी, स्ट्रेचर तसेच अन्य आवश्यक वैद्यकीय साहित्याचा समावेश आहे. या सुविधांचा लाभ आडिवरेसह परिसरातील गरजू नागरिक आणि रुग्णांना मिळणार आहे.
ग्रामीण भागात वैद्यकीय उपकरणांच्या अभावामुळे रुग्णांना अनेक अडचणींचा सामना करावा लागतो. अशा परिस्थितीत या उपकरणांमुळे रुग्णांची ने-आण, देखभाल आणि गरजू कुटुंबांना आवश्यक वैद्यकीय साहित्य उपलब्ध करून देणे अधिक सुलभ होणार आहे. स्थानिक पातळीवर मदत मिळाल्याने रुग्ण आणि त्यांच्या कुटुंबीयांना मोठा दिलासा मिळण्याची अपेक्षा आहे.
फिनोलेक्स इंडस्ट्रीज लिमिटेड आणि मुकुल माधव फाउंडेशन यांच्या संयुक्त सामाजिक उपक्रमातून ग्रामीण आरोग्यसेवा अधिक सक्षम करण्याच्या दिशेने महत्त्वपूर्ण पाऊल उचलण्यात आले आहे. सामाजिक बांधिलकी जपत गरजू नागरिकांच्या आरोग्यविषयक गरजांना प्राधान्य देणारा हा उपक्रम आडिवरे आणि परिसरासाठी उपयुक्त ठरणार आहे.
या वैद्यकीय उपकरणांमुळे गरजू रुग्णांना आवश्यक सुविधा उपलब्ध होण्यास मदत होईल, असा विश्वास ग्रामस्थांनी व्यक्त केला. ग्रामीण भागातील आरोग्यसेवेला बळकटी देण्यासाठी अशा उपक्रमांचे महत्त्व अधोरेखित होत आहे.
