दापोली, दि. ०८ (प्रतिनिधी): रक्षाबंधनाच्या पार्श्वभूमीवर दापोली शहरात सध्या एक वेगळाच उपक्रम चर्चेत आहे. एसटी बस स्थानकात एक तरुण हातात भावनिक संदेश लिहिलेला पोस्टर घेऊन उभा असतो आणि प्रवाशांचे लक्ष वेधून घेतो. “राखी बांधून जाशील का… पण तू माझी खरी लाडकी बहीण होशील का?” — या अनोख्या प्रश्नामुळे सर्वच जण थांबून त्याच्याकडे पाहतात. या ‘पोस्टर बॉय’ची ओळख जयदीप पाटील अशी असून, दापोली नगरपंचायतीच्या नगरसेविका रिया सावंत आणि अश्विनी लांजेकर यांनी त्याला राखी बांधून या उपक्रमाला शुभेच्छा दिल्या.
या उपक्रमामागील उद्देशाबाबत जयदीपने अद्याप स्पष्टपणे भाष्य केले नसले तरी, संदेशामधून बहिण-भावाच्या नात्याचा रक्तसंबंधाच्या पलीकडील भावनिक अर्थ मांडण्याचा प्रयत्न दिसतो. मुलींना सन्मान देणे, त्यांच्या सुरक्षिततेची जबाबदारी स्वीकारणे आणि सामाजिक बंध दृढ करणे हा यामागील व्यापक हेतू असल्याची चर्चा आहे. प्रवाशांमध्ये या उपक्रमाचे कौतुक होत असून, “पोस्टर बॉय” सध्या चर्चेचा विषय ठरला आहे.
न्यायालयात प्रथमच रक्षाबंधन
दरम्यान, नगरसेविका रिया सावंत यांच्या पुढाकाराने दापोली न्यायालयात प्रथमच रक्षाबंधन सोहळा आयोजित करण्यात आला. वकिलांना राखी बांधून सण साजरा करण्याच्या या उपक्रमाला चांगला प्रतिसाद मिळाला. वकिलांनी आनंदाने राखी बांधून घेत आपल्या भगिनी रिया सावंत, अश्विनी लांजेकर, दर्शना राऊत आणि सुप्रिया बर्जे यांचे आभार मानले.
दापोलीतले हे दोन्ही उपक्रम—बस स्थानकातील ‘पोस्टर बॉय’चा भावनिक संदेश आणि न्यायालयातील राखी सोहळा—रक्षाबंधनाला केवळ सणापुरते न ठेवता सामाजिक बांधिलकीची नवी छटा देणारे ठरले आहेत.
