पुणे, दि. २२ : पुणे जिल्ह्यातील वाघोली येथे पार पडलेल्या ६८ व्या महाराष्ट्र केसरी कुस्ती स्पर्धेत नाशिकच्या हर्षवर्धन सदगीर यांनी दमदार कामगिरी करत मानाचा महाराष्ट्र केसरी किताब पटकावला. अंतिम सामन्यात त्यांनी सोलापूरच्या महेंद्र गायकवाड यांचा ४-३ असा थरारक पराभव करत ‘डबल महाराष्ट्र केसरी’ होण्याचा मान मिळवला. या विजयानंतर राज्यभरातून त्यांच्यावर अभिनंदनाचा वर्षाव होत आहे.
रामकृष्ण अण्णा सातव पाटील यांच्या वतीने आयोजित या प्रतिष्ठेच्या स्पर्धेचा अंतिम सामना अत्यंत चुरशीचा आणि शेवटच्या क्षणापर्यंत रंगलेला ठरला. पहिल्या फेरीत दोन्ही पैलवानांनी सावध खेळ करत प्रत्येकी एक गुण मिळवला. मात्र दुसऱ्या फेरीत हर्षवर्धन सदगीर यांनी आक्रमक पवित्रा घेत निर्णायक खेळी करत ४-३ अशी आघाडी घेतली आणि विजय निश्चित केला.
या विजयासह हर्षवर्धन सदगीर यांनी दुसऱ्यांदा महाराष्ट्र केसरी किताब पटकावत ‘डबल महाराष्ट्र केसरी’ होण्याचा बहुमान मिळवला. तर महेंद्र गायकवाड यांना तिसऱ्यांदा उपविजेतेपदावर समाधान मानावे लागले.
मानाची गदा आणि आकर्षक बक्षिसांचा वर्षाव
स्पर्धेतील विजेत्या हर्षवर्धन सदगीर यांना मानाची चांदीची गदा, ५ लाख रुपये रोख आणि आलिशान फॉर्च्युनर गाडी देऊन गौरविण्यात आले. मंत्री दादा भुसे आणि दत्तात्रय भरणे यांच्या हस्ते हा सन्मान प्रदान करण्यात आला. यंदाच्या स्पर्धेत बक्षिसांचा विशेष आकर्षण असल्याने राज्यभरातील कुस्तीप्रेमींचे लक्ष या स्पर्धेकडे लागले होते.
चुरशीची अंतिम लढत; प्रेक्षक मंत्रमुग्ध
महेंद्र गायकवाड यांनी माती विभागात सिकंदर शेख यांचा पराभव करून अंतिम फेरीत प्रवेश केला होता. तर हर्षवर्धन सदगीर यांनी गादी (मॅट) विभागात जय पाटीलवर मात करत अंतिम सामन्यात धडक मारली. अंतिम लढत अत्यंत अटीतटीची झाली असून दोन्ही पैलवानांनी कौशल्य, ताकद आणि चातुर्याचे उत्कृष्ट प्रदर्शन केले. प्रेक्षकांनी या लढतीला उत्स्फूर्त प्रतिसाद दिला.
उपमुख्यमंत्री सुनेत्रा पवार यांचे अभिनंदन
उपमुख्यमंत्री सुनेत्रा अजित पवार यांनी विजेते हर्षवर्धन सदगीर आणि उपविजेते महेंद्र गायकवाड यांचे अभिनंदन करत म्हटले की, “अंतिम सामना अत्यंत रोमांचक झाला. या लढतीने महाराष्ट्राच्या कुस्ती परंपरेची मान उंचावली. कुस्ती हा आपल्या संस्कृतीचा अविभाज्य भाग असून आजचे तरुण पैलवान ही परंपरा समर्थपणे पुढे नेत आहेत, ही अभिमानाची बाब आहे.”
विविध गटांमध्ये दमदार कामगिरी
स्पर्धेत माती आणि गादी या दोन्ही विभागांमध्ये विविध वजन गटांतील सामने रंगले. कोल्हापूर, सोलापूर, पुणे, सातारा, बीड, नाशिक आदी जिल्ह्यांतील पैलवानांनी उल्लेखनीय कामगिरी करत आपली छाप पाडली. माती विभागात मृणाल पाटील, अमोल वालगुडे, शनिराज निंबाळकर, तेजस गोफणे यांसारख्या पैलवानांनी विजय मिळवला. तर गादी विभागात अक्षय ढेरे, वैभव पाटील, सुमितकुमार बारस्कर, आदर्श पाटील, अभिषेक कापडे आदींनी उत्कृष्ट प्रदर्शन केले.
महाराष्ट्र केसरीची परंपरा आणि मानाचा इतिहास
१९६१ पासून सुरू झालेल्या महाराष्ट्र केसरी स्पर्धेला राज्यातील कुस्ती क्षेत्रात सर्वोच्च मानाचे स्थान आहे. कुस्तीमहर्षी मामासाहेब मोहोळ यांच्या पुढाकाराने सुरू झालेल्या या स्पर्धेत विजेत्याला चांदीची गदा देण्याची परंपरा आहे. सागाच्या लाकडावर चांदीचे नक्षीकाम केलेली ही गदा साधारण ८ ते १० किलो वजनाची असते. या गदेवर एका बाजूला हनुमानाचे तर दुसऱ्या बाजूला मामासाहेब मोहोळ यांचे छायाचित्र असते.
ही मानाची गदा मिळवणे हे प्रत्येक पैलवानाचे स्वप्न मानले जाते. त्यामुळे महाराष्ट्र केसरी स्पर्धा केवळ क्रीडा स्पर्धा नसून परंपरा, प्रतिष्ठा आणि अभिमानाचे प्रतीक मानली जाते.
राज्याच्या कुस्ती परंपरेला नवी उंची
यंदाची स्पर्धा अत्यंत रंगतदार ठरली असून अनेक थरारक सामने पाहायला मिळाले. युवा आणि अनुभवी पैलवानांमधील संघर्षामुळे स्पर्धेला वेगळीच उंची प्राप्त झाली. हर्षवर्धन सदगीर यांच्या विजयानंतर कुस्ती क्षेत्रात नव्या पिढीचा दबदबा अधोरेखित झाला आहे.
एकूणच, ६८ व्या महाराष्ट्र केसरी स्पर्धेने राज्याच्या समृद्ध कुस्ती परंपरेचा गौरव वाढवला असून हर्षवर्धन सदगीर यांच्या यशाने या परंपरेला नवी दिशा मिळाल्याचे चित्र पाहायला मिळत आहे.
