मुंबई, दि. १ : राष्ट्रवादी काँग्रेस पक्षाच्या राष्ट्रीय अध्यक्षपदी माझी नियुक्ती झाल्याबाबत काही प्रसारमाध्यमांमध्ये प्रसारित होत असलेल्या बातम्या पूर्णपणे निराधार व तथ्यहीन असल्याचे स्पष्टपणे खंडन राष्ट्रीय कार्याध्यक्ष खासदार प्रफुल पटेल यांनी केले आहे. त्यांनी यासंदर्भात ‘एक्स’ (पूर्वीचे ट्विटर) पोस्टद्वारे आपली भूमिका मांडली.
प्रफुल पटेल यांनी आपल्या पोस्टमध्ये नमूद केले की, राष्ट्रवादी काँग्रेस हा लोकशाही मूल्यांवर चालणारा पक्ष असून कोणताही महत्त्वाचा निर्णय पक्षातील वरिष्ठ नेते, आमदार, पदाधिकारी तसेच सर्व कार्यकर्त्यांच्या भावना लक्षात घेऊन आणि सामूहिक इच्छेचा आदर करूनच घेतला जातो. अशा कोणत्याही नियुक्तीबाबत सध्या कोणताही अधिकृत निर्णय झालेला नाही.
तसेच, एक राष्ट्रीय पक्ष म्हणून अशा महत्त्वाच्या विषयांमध्ये पक्षाची ठरावीक आणि विहित प्रक्रिया काटेकोरपणे पाळली जाते, असेही त्यांनी स्पष्ट केले. त्यामुळे त्यांच्या राष्ट्रीय अध्यक्षपदी नियुक्ती झाल्याच्या बातम्यांमध्ये कोणतेही तथ्य नसल्याचे त्यांनी ठामपणे सांगितले.
दरम्यान, सोशल मीडियावर व काही माध्यमांमध्ये पसरवण्यात येत असलेल्या अफवांवर विश्वास ठेवू नये, असे आवाहनही प्रफुल पटेल यांनी अप्रत्यक्षपणे केले आहे. राष्ट्रवादी काँग्रेस पक्षाबाबतचा कोणताही अधिकृत निर्णय पक्षाकडून अधिकृतपणे जाहीर केला जाईल, असेही त्यांनी स्पष्ट केले.
