रत्नागिरी, दि. १६ : ऐन गणेशोत्सवाच्या धामधुमीत बुधवारी दुपारनंतर रत्नागिरी जिल्ह्यात परतीच्या पावसाने जोरदार हजेरी लावली. विजांच्या लखलखाटासह ढगांच्या गडगडाटात मुसळधार पाऊस बरसला. अचानक आलेल्या पावसामुळे शेतकऱ्यांसह बाजारपेठेतील व्यापाऱ्यांची मोठी धावपळ उडाली. जिल्ह्यातील अनेक भागांत तासाभराहून अधिक काळ पावसाच्या जोरदार सरी सुरू होत्या.
जिल्हाभरात गणेशोत्सवाचा उत्साह शिगेला पोहोचला आहे. मंगळवारी दीड दिवसांच्या गणरायांना भावपूर्ण निरोप देण्यात आला. आता गौरीच्या आगमनासाठी भाविकांची लगबग सुरू झाली आहे. गौरीच्या पूजेसाठी आवश्यक साहित्य खरेदी करण्यासाठी बाजारपेठांमध्ये गर्दी वाढत असतानाच अचानक पावसाने हजेरी लावल्याने व्यापाऱ्यांची चांगलीच पंचाईत झाली.
गौरी सणाच्या पार्श्वभूमीवर रत्नागिरी शहरातील बाजारपेठ आकर्षकपणे सजविण्यात आली होती. व्यापाऱ्यांनी विविध वस्तू दुकानांसमोर तसेच रस्त्यालगत मांडल्या होत्या. मात्र, काही क्षणांतच मुसळधार पाऊस सुरू झाल्याने उघड्यावर ठेवलेल्या साहित्याचे नुकसान झाले. पावसापासून माल वाचविण्यासाठी व्यापाऱ्यांची धावपळ उडाली.
अचानक आलेल्या पावसाने खरेदीवर परिणाम
बुधवारी सायंकाळी पाच वाजण्याच्या सुमारास आकाशात अचानक काळे ढग दाटून आले आणि त्यानंतर मुसळधार पावसाला सुरुवात झाली. पावसामुळे बाजारपेठेतील खरेदीवरही परिणाम झाला. गणेशोत्सवामुळे आधीच गजबजलेल्या बाजारपेठेत पावसामुळे नागरिकांना सुरक्षित ठिकाणी आसरा घ्यावा लागला.
हवामान विभागाच्या अंदाजानुसार पुढील काही दिवस जिल्ह्यात पावसाचा जोर कायम राहण्याची शक्यता आहे. त्यामुळे गणेशोत्सवाच्या काळात बाजारपेठेत व्यवसाय करणाऱ्या व्यापाऱ्यांमध्ये चिंतेचे वातावरण आहे. पावसाचा जोर कायम राहिल्यास सणासुदीच्या खरेदीवर परिणाम होण्याबरोबरच व्यापाऱ्यांचे नुकसान वाढण्याची शक्यता व्यक्त होत आहे.
दरम्यान, अचानक आलेल्या परतीच्या पावसामुळे शेतकऱ्यांचीही चिंता वाढली आहे. ऐन सणासुदीच्या काळात पावसाने जोर धरल्याने बळीराजासह व्यापाऱ्यांच्या अडचणी वाढल्या आहेत.
