पुणे, दि. ७ : राज्याचे दिवंगत उपमुख्यमंत्री अजित पवार यांच्या विमान अपघाती मृत्यूप्रकरणी अनेक शंका उपस्थित होत असून या घटनेची सखोल चौकशी व्हावी, अशी मागणी राष्ट्रवादी काँग्रेस (शरद पवार गट) चे आमदार रोहित पवार यांनी केली आहे. या प्रकरणाचा तपास पारदर्शक आणि निष्पक्ष पद्धतीने व्हावा यासाठी इंडिया आघाडीने हा मुद्दा गांभीर्याने घ्यावा, तसेच विरोधी पक्षांच्या नेत्यांची समिती स्थापन करून त्या समितीच्या अध्यक्षपदी काँग्रेस नेते राहुल गांधी यांची नियुक्ती करावी, असे मतही त्यांनी व्यक्त केले.
शुक्रवारी रोहित पवार यांनी राज्य गुन्हे अन्वेषण विभागाच्या (CID) पुणे येथील कार्यालयाला भेट देऊन संबंधित अधिकाऱ्यांशी चर्चा केली. या भेटीनंतर प्रसारमाध्यमांशी संवाद साधताना त्यांनी अजित पवार यांच्या विमान अपघाताबाबत विविध शंका उपस्थित केल्या. या अपघातामागे नेमके काय कारण होते, हा केवळ अपघात होता की त्यामागे घाताचा कोणताही प्रकार आहे का, याचा सखोल तपास होणे आवश्यक असल्याचे त्यांनी नमूद केले.
रोहित पवार म्हणाले की, या घटनेमुळे राज्यातील जनतेमध्येही संभ्रमाचे वातावरण निर्माण झाले आहे. त्यामुळे सत्य समोर येणे अत्यंत गरजेचे आहे. या प्रकरणात सर्व तांत्रिक बाबी, विमानाची स्थिती, हवामानाची परिस्थिती तसेच इतर संभाव्य कारणांचा बारकाईने तपास करून सत्य उजेडात आणले पाहिजे. या संदर्भात निष्पक्ष चौकशी झाल्यास अनेक शंका दूर होऊ शकतील, असेही त्यांनी सांगितले.
यासाठी इंडिया आघाडीने पुढाकार घेऊन विरोधी पक्षांच्या नेत्यांची एक विशेष समिती स्थापन करावी, अशी मागणी त्यांनी केली. या समितीच्या अध्यक्षपदी काँग्रेसचे वरिष्ठ नेते राहुल गांधी यांची नियुक्ती करण्यात यावी, असेही रोहित पवार यांनी सुचवले. अशा समितीमार्फत या प्रकरणाचा स्वतंत्र आणि सखोल आढावा घेता येईल, असे त्यांचे मत आहे.
दरम्यान, अजित पवार यांच्या विमान अपघातानंतर राज्याच्या राजकारणात विविध चर्चा रंगल्या असून या प्रकरणाची चौकशी आणि त्यातून पुढे येणारे निष्कर्ष याकडे सर्वांचे लक्ष लागले आहे. रोहित पवार यांनी उपस्थित केलेल्या मागणीमुळे या प्रकरणाला नवे राजकीय वळण मिळण्याची शक्यता व्यक्त केली जात आहे.
