नवी दिल्ली, दि. ०६ : ज्येष्ठ नेते आणि राष्ट्रवादी काँग्रेस (शरदचंद्र पवार पक्ष) प्रमुख शरद पवार यांनी सोमवारी (६ एप्रिल) संसद भवनात तिसऱ्यांदा राज्यसभेच्या सदस्यत्वाची शपथ घेतली. प्रकृती अस्वास्थ्यामुळे त्यांनी व्हीलचेअरवर बसून शपथ घेतली. त्यांच्या या उपस्थितीने आणि जिद्दीने राजकीय वर्तुळात विशेष चर्चा रंगली आहे.
राज्यसभेत नव्याने निवडून आलेल्या सदस्यांच्या शपथविधीचा सोहळा सोमवारी पार पडला. यावेळी देशभरातील एकूण १९ सदस्यांनी पद आणि गोपनीयतेची शपथ घेतली. राज्यसभेचे सभापती तथा उपराष्ट्रपती सी. पी. राधाकृष्णन यांच्या हस्ते हा शपथविधी सोहळा पार पडला. या कार्यक्रमाला उपसभापती हरिवंश, संसदीय कामकाज मंत्री किरेन रिजिजू, तसेच विविध पक्षांचे नेते, खासदार आणि मान्यवर मोठ्या संख्येने उपस्थित होते.
शरद पवार यांच्या शपथविधीकडे विशेष लक्ष लागलं होतं. गेल्या काही काळापासून त्यांच्या प्रकृतीबाबत चिंता व्यक्त केली जात असताना त्यांनी व्हीलचेअरवरून संसदेत हजेरी लावून शपथ घेतली. यामुळे त्यांच्या राजकीय सक्रियतेचा आणि दृढनिश्चयाचा पुन्हा प्रत्यय आला. दीर्घकाळ राज्य आणि राष्ट्रीय राजकारणात महत्त्वाची भूमिका बजावणारे पवार हे अनुभवसंपन्न नेतृत्व म्हणून ओळखले जातात. त्यांच्या पुनरागमनामुळे राज्यसभेतील विरोधी पक्षाच्या राजकारणाला बळ मिळण्याची शक्यता व्यक्त केली जात आहे.
महाराष्ट्रातून निवडून आलेल्या इतर सदस्यांनीही यावेळी शपथ घेतली. यामध्ये केंद्रीय मंत्री रामदास आठवले, रामराव वडकुते, माया चिंतामण ईवनाते आणि ज्योती वाघमारे यांचा समावेश आहे. विशेष म्हणजे, ज्योती वाघमारे यांनी समाजसुधारक सावित्रीबाई फुले यांच्या वेशात शपथ घेतली. त्यांच्या या अनोख्या कृतीने सभागृहातील सदस्यांचे लक्ष वेधून घेतले आणि सामाजिक संदेशही दिला.
दरम्यान, भाजपाचे राष्ट्रीय सरचिटणीस विनोद तावडे यांचा शपथविधी १० एप्रिल रोजी होण्याची शक्यता वर्तवली जात आहे. तसेच राष्ट्रवादी काँग्रेसकडून प्रथमच राज्यसभेवर निवडून आलेले पार्थ पवार हे ९ एप्रिल रोजी शपथ घेणार असल्याची माहिती सूत्रांनी दिली आहे. त्यामुळे महाराष्ट्रातील प्रतिनिधित्व आणखी मजबूत होणार आहे.
या शपथविधीनंतर राज्यसभेतील राजकीय समीकरणांमध्ये काही प्रमाणात बदल होण्याची शक्यता राजकीय जाणकार व्यक्त करत आहेत. महायुती आणि महाविकास आघाडी या दोन्ही गटांकडून आपापली ताकद वाढवण्याचे प्रयत्न सुरू असून, आगामी अधिवेशनात याचा प्रभाव दिसून येण्याची शक्यता आहे.
शरद पवार यांचा हा तिसरा राज्यसभा कार्यकाळ असून, त्यांच्या दीर्घ राजकीय अनुभवामुळे सभागृहातील चर्चांमध्ये महत्त्वपूर्ण योगदान मिळण्याची अपेक्षा व्यक्त केली जात आहे. कृषी, सहकार, अर्थकारण आणि राष्ट्रीय राजकारणातील त्यांचा अभ्यास लक्षात घेता ते पुन्हा एकदा सक्रिय भूमिका बजावतील, अशी राजकीय वर्तुळात चर्चा आहे.
महाराष्ट्रातील नवनिर्वाचित राज्यसभा सदस्य :
- विनोद तावडे – भाजपा (महायुती)
- रामदास आठवले – भाजपा (महायुती)
- माया चिंतामण ईवनाते – भाजपा (महायुती)
- रामराव वडकुते – भाजपा (महायुती)
- ज्योती वाघमारे – शिवसेना (महायुती)
- पार्थ पवार – राष्ट्रवादी काँग्रेस (महायुती)
-
शरद पवार – राष्ट्रवादी काँग्रेस (शरदचंद्र पवार पक्ष, महाविकास आघाडीचा पाठिंबा)**
