नवी दिल्ली, दि. २१ : नीट (NEET) पेपरफुटी प्रकरणावरून राजधानी दिल्लीत सुरू असलेल्या विद्यार्थी आंदोलनाला आता प्रमुख विरोधी पक्षांचा पाठिंबा मिळू लागला आहे. लोकसभेतील विरोधी पक्षनेते राहुल गांधी यांनी काँग्रेसच्या खासदारांसह पंतप्रधान नरेंद्र मोदी यांच्या निवासस्थानाबाहेर जाऊन निषेध नोंदवला, तर राष्ट्रवादी काँग्रेस (शरद पवार गट) अध्यक्ष शरद पवार यांनी जंतर-मंतरवर जाऊन आंदोलक विद्यार्थ्यांशी संवाद साधत त्यांच्या मागण्यांना पाठिंबा दिला.
कॉकरोच जनता पार्टी (CJP)च्या नेतृत्वाखाली केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी विद्यार्थ्यांनी संसदेकडे मोर्चा काढण्याचा प्रयत्न केला होता. मात्र, दिल्ली पोलिसांनी त्यांना संसद परिसरात जाण्यापासून रोखले. यावेळी विद्यार्थ्यांवर लाठीचार्ज झाल्याचा आरोप करण्यात आला. या घटनेच्या निषेधार्थ CJPचे संस्थापक अभिजीत दिपके यांच्या नेतृत्वाखाली जंतर-मंतरवर आंदोलन सुरू असून, पेपरफुटीची निष्पक्ष चौकशी आणि दोषींवर कठोर कारवाईची मागणी आंदोलकांकडून केली जात आहे.
विद्यार्थ्यांवरील कथित लाठीचार्जनंतर राहुल गांधी, प्रियांका गांधी आणि काँग्रेसचे अनेक खासदार थेट पंतप्रधान नरेंद्र मोदी यांच्या निवासस्थानाजवळ पोहोचले. यावेळी राहुल गांधी यांनी नीट पेपरफुटीची नैतिक जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी तत्काळ राजीनामा द्यावा, अशी मागणी केली. तसेच विद्यार्थ्यांवर लाठीचार्ज करण्याचे आदेश देणाऱ्यांची जबाबदारी निश्चित करून केंद्रीय गृहमंत्री अमित शाह आणि पंतप्रधान नरेंद्र मोदी यांनीही उत्तर द्यावे, असे त्यांनी म्हटले.
दरम्यान, आंदोलनस्थळी केंद्रीय मंत्री डॉ. जितेंद्र सिंह आणि केंद्रीय गृहसचिव गोविंद मोहन यांनी राहुल गांधी यांची भेट घेतली. दोन्ही बाजूंमध्ये सुमारे अर्धा तास चर्चा झाली. सरकारकडून आंदोलन मागे घेण्याचे आवाहन करण्यात आल्याचे सांगण्यात येत असले, तरी चर्चेनंतरही राहुल गांधी आपल्या भूमिकेवर ठाम राहिले. त्यामुळे कोणताही तोडगा निघू शकला नाही.
दुसरीकडे, शरद पवार यांनी जंतर-मंतरवर पोहोचून अभिजीत दिपके आणि आंदोलनकर्त्या विद्यार्थ्यांशी चर्चा केली. विद्यार्थ्यांवर झालेल्या कथित लाठीचार्जबद्दल त्यांनी चिंता व्यक्त केली. पेपरफुटीमुळे लाखो विद्यार्थ्यांचे भविष्य धोक्यात आले असून, दोषींवर कठोर कारवाई झाली पाहिजे, अशी भूमिका त्यांनी मांडल्याचे सांगण्यात आले. यावेळी अभिजीत दिपके यांनी, “खासगी क्षेत्रात एखाद्या कर्मचाऱ्याकडून दोन-तीन चुका झाल्या तर त्याला नोकरीवरून काढले जाते. मात्र लाखो विद्यार्थ्यांच्या भवितव्याशी खेळ होऊनही शिक्षणमंत्र्यांवर कोणतीही कारवाई होत नाही,” अशी नाराजी व्यक्त केली.
याचदरम्यान राहुल गांधी आणि प्रियांका गांधी यांनी राम मनोहर लोहिया रुग्णालयात जाऊन लाठीचार्जमध्ये जखमी झालेल्या विद्यार्थ्यांची भेट घेतली आणि त्यांच्या प्रकृतीची विचारपूस केली. केंद्रीय आरोग्यमंत्री जे. पी. नड्डा यांनीही रुग्णालयात भेट देऊन जखमी विद्यार्थ्यांची माहिती घेत डॉक्टरांसोबत आढावा बैठक घेतली.
संसदेचे पावसाळी अधिवेशन सुरू असतानाच नीट पेपरफुटीचा मुद्दा अधिकच तापला असून, आंदोलनाला विरोधी पक्षांचा वाढता पाठिंबा मिळत आहे. त्यामुळे हा विषय संसदेतही जोरदार गाजण्याची शक्यता असून, सरकार आणि विरोधकांमध्ये यावरून तीव्र राजकीय संघर्ष होण्याची चिन्हे आहेत.
