मुंबई, दि. १९: संसदेच्या पावसाळी अधिवेशनाच्या पार्श्वभूमीवर शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी केंद्र सरकारवर जोरदार टीका केली. लडाखचे पर्यावरणवादी सोनम वांगचुक यांच्या आंदोलनाला पाठिंबा देण्यासाठी मुंबईतील शिवाजी पार्क येथे आयोजित सभेत बोलताना त्यांनी, “लष्करासाठी काम करणारे सोनम वांगचुक देशद्रोही कसे?” असा थेट सवाल उपस्थित केला. तसेच राष्ट्रीय स्वयंसेवक संघाचे सरसंघचालक मोहन भागवत यांनाही प्रश्न विचारत सध्याच्या घडामोडींवर भाष्य केले.
उद्धव ठाकरे म्हणाले की, देशातील तरुणांना रोजगार, दर्जेदार शिक्षण आणि सुरक्षित भविष्य देण्यात केंद्र सरकार अपयशी ठरले आहे. त्यामुळे हे सरकार बदलणे गरजेचे असून कार्यकर्त्यांनी आता केवळ कार्यकर्ते न राहता नेतृत्व स्वीकारावे, असे आवाहन त्यांनी केले. “आज तुमच्यात दिसणारी आग सरकार बदलेपर्यंत कायम पेटती राहिली पाहिजे,” असे ते म्हणाले.
सोनम वांगचुक यांच्या कार्याचा उल्लेख करताना ठाकरे म्हणाले की, लडाखमध्ये सैनिकांसाठी सौरऊर्जेवर चालणारे कॅम्प उभारणे, कृत्रिम हिमनद्या तयार करून पाण्याच्या समस्येवर उपाय शोधणे अशा अनेक महत्त्वाच्या कामांमुळे वांगचुक यांनी देशाची सेवा केली आहे. अशा व्यक्तीला देशद्रोही किंवा चीनचा हस्तक ठरवणे योग्य नाही, असा सवाल त्यांनी उपस्थित केला.
राष्ट्रीय स्वयंसेवक संघाच्या भूमिकेवर टीका करताना त्यांनी, “पाकिस्तानसोबत चर्चा करण्याची भूमिका मांडली जाते; मात्र देशासाठी काम करणाऱ्या वांगचुक यांच्याशी संवाद साधण्यास सरकार तयार नाही. हेच संघाच्या कल्पनेतील हिंदू राष्ट्र आहे का?” असा प्रश्न सरसंघचालक मोहन भागवत यांना उद्देशून विचारला.
अण्णा हजारे यांच्या आंदोलनाची आठवण करून देत ठाकरे म्हणाले की, तत्कालीन पंतप्रधान डॉ. मनमोहन सिंग यांनी आंदोलनकर्त्यांशी संवाद साधला होता. मात्र सध्याचे सरकार आंदोलन दडपण्याचा प्रयत्न करत असून लोकशाही मूल्यांकडे दुर्लक्ष करत आहे, असा आरोप त्यांनी केला.
सोनम वांगचुक यांना जंतरमंतरवरून ताब्यात घेऊन रुग्णालयात दाखल केल्याच्या घटनेचाही त्यांनी उल्लेख केला. “चादरीने आंदोलन झाकण्याचा प्रयत्न केला तरी सत्य कधीच लपणार नाही. सरकारच्या पापांचा घडा भरत आला आहे,” असा टोला त्यांनी लगावला.
यावेळी उद्धव ठाकरे यांनी केंद्र सरकारला निवडणुकांचेही आव्हान दिले. “हिम्मत असेल तर निवडणुका जाहीर करा. आम्ही पूर्ण ताकदीने लढायला तयार आहोत,” असे ते म्हणाले.
दरम्यान, या सभेत सोनम वांगचुक यांच्या आंदोलनाला पाठिंबा देत विद्यार्थ्यांचे प्रश्न, कथित नीट पेपरफुटी प्रकरण, रोजगार, शिक्षण आणि लोकशाहीच्या मुद्द्यांवरून केंद्र सरकारवर जोरदार टीका करण्यात आली.
