दापोली, दि. २४ : उन्हाळी सुट्टी आणि त्याला जोडून आलेल्या विकेंडमुळे कोकणातील ‘मिनी महाबळेश्वर’ म्हणून प्रसिद्ध असलेल्या दापोली तालुक्यात पर्यटकांची मोठी गर्दी उसळली आहे. राज्याच्या विविध भागांतून आलेल्या पर्यटकांच्या वाढत्या ओघामुळे दापोलीतील प्रमुख पर्यटनस्थळे हाऊसफुल्ल झाली असून, प्रसिद्ध मुरुड समुद्रकिनारा पर्यटकांनी अक्षरशः फुलून गेला आहे.
कोकणच्या निसर्गरम्य वातावरणासह विस्तीर्ण समुद्रकिनारे, हिरवागार परिसर आणि आल्हाददायक हवामान यामुळे दापोली नेहमीच पर्यटकांचे आकर्षण ठरते. याच वैशिष्ट्यांमुळे दापोलीला ‘मिनी महाबळेश्वर’ अशी ओळख प्राप्त झाली आहे. सध्या शाळा-महाविद्यालयांना उन्हाळ्याची सुट्टी सुरू असून शनिवार-रविवारची जोड सुट्टी लाभल्याने शहरी भागातील उकाड्यापासून दिलासा मिळवण्यासाठी अनेकांनी कुटुंबासह दापोलीकडे धाव घेतली आहे.
दापोलीतील पर्यटनस्थळांमध्ये मुरुड समुद्रकिनारा हा पर्यटकांच्या विशेष पसंतीचा ठरला. समुद्राच्या लाटांमध्ये डुंबण्याचा आनंद लुटण्यासाठी पर्यटकांनी मोठी गर्दी केली होती. लहान मुलांपासून ते ज्येष्ठांपर्यंत सर्वच जण समुद्रकिनाऱ्यावर फेरफटका मारताना, जालक्रीडा खेळांचा आनंद घेताना आणि निसर्गसौंदर्याचा आस्वाद घेताना दिसून आले.
पर्यटकांच्या वाढत्या संख्येमुळे स्थानिक हॉटेल व्यावसायिक, होमस्टे चालक, खाद्यपदार्थ विक्रेते तसेच पर्यटनाशी संबंधित छोट्या-मोठ्या व्यवसायांना मोठी चालना मिळाली आहे. स्थानिक व्यापाऱ्यांमध्ये समाधानाचे वातावरण असून आगामी काही दिवसांतही पर्यटकांची ही गर्दी कायम राहण्याची शक्यता व्यक्त केली जात आहे.
