ग्लासगो, दि. २७ : भारतीय वेटलिफ्टिंगची स्टार खेळाडू सैखोम मीराबाई चानू हिने २०२६ राष्ट्रकुल क्रीडा स्पर्धेत (CWG 2026) महिलांच्या ४८ किलो वजनी गटात सुवर्णपदक जिंकत इतिहास रचला आहे. स्कॉटलंडमधील ग्लासगो येथे सुरू असलेल्या स्पर्धेत तिने सलग तिसरे राष्ट्रकुल सुवर्णपदक पटकावत आपल्या नावावर आणखी एक विक्रम नोंदवला. यासह भारताच्या खात्यातील हे स्पर्धेतील पहिले सुवर्णपदक ठरले.
मीराबाईने स्नॅच प्रकारात ८५ किलो वजन उचलून नवीन राष्ट्रकुल विक्रम प्रस्थापित केला. यापूर्वी तिच्याच नावावर असलेला ८२ किलोचा विक्रम तिने मोडीत काढला. तिसऱ्या प्रयत्नात तिने सहजपणे ८५ किलो वजन उचलत स्पर्धेच्या इतिहासातील सर्वोत्तम कामगिरीची नोंद केली. राष्ट्रकुल देशातील कोणत्याही महिला खेळाडूने प्रमुख आंतरराष्ट्रीय स्पर्धेत उचललेले हे सर्वोच्च वजन मानले जात आहे.
स्पर्धेच्या सुरुवातीला मात्र मीराबाईला अपयशाचा सामना करावा लागला. ८२ किलो वजन उचलण्याच्या पहिल्या प्रयत्नात बारबेल डोक्यावर नेल्यानंतर ती तोल सावरू शकली नाही आणि प्रयत्न अयशस्वी ठरला. मात्र, त्यानंतर तिने मानसिक खंबीरपणा दाखवत दमदार पुनरागमन केले आणि अखेर सुवर्णपदकावर नाव कोरले.
दरम्यान, पुरुषांच्या ६० किलो वजनी गटात भारताच्या ऋषिकांत सिंग याने आपल्या पहिल्याच राष्ट्रकुल स्पर्धेत उल्लेखनीय कामगिरी करत २६४ किलो (१२१ किलो स्नॅच + १४३ किलो क्लीन अँड जर्क) वजन उचलून रौप्यपदक जिंकले. त्यामुळे भारताच्या पदकसंख्येत आणखी भर पडली.
याशिवाय जलतरण स्पर्धेत श्रीहरी नटराज, आर्यन नेहरा, अनिश गौडा आणि दक्षिण शशिकुमार या भारतीय चौकडीने पुरुषांच्या ४x२०० मीटर फ्रीस्टाइल रिले प्रकारात तिसरे स्थान मिळवत अंतिम फेरीत प्रवेश केला. मात्र, महिलांच्या लॉन बाऊल्स जोडीच्या सामन्यात रुपा राणी तिर्की आणि पिंकी सिंग यांना नामिबियाकडून टायब्रेकरमध्ये पराभव स्वीकारावा लागला.
मीराबाई चानूच्या ऐतिहासिक सुवर्णपदकामुळे राष्ट्रकुल स्पर्धेत भारताच्या मोहिमेला शानदार सुरुवात मिळाली असून, आगामी दिवसांत भारतीय खेळाडूंकडून आणखी पदकांची अपेक्षा व्यक्त केली जात आहे.
